Velkomin á heimasíðu Surtseyjarfélagsins.

Surtseyjarfélagið hefur verið starfandi síðan 1965, tveimur árum eftir upphaf goss í Surtsey. Frekari umfjöllun um félagið er að finna hér.

Síðunni er ætlað að vera almenningi og áhugasömum brunnur fróðleiks um eyjuna og þróun hennar. Hér er að finna helstu upplýsingar um uppruna Surtseyjar og þróun hennar bæði hvað jarðfræði snertir og líffræði.

Vísindamenn og fræðimenn, hver á sínu sviði, hafa lagt til þann texta sem hér er að finna og verður hann uppfærður og yfirfarinn reglulega. Sjálfsagt er að vitna í textann og ber þá að geta heimilda.

 

18. apríl 2010

 

13. apríl 2010

Nýleg vefmyndavél úti í Surtsey hefur nýst á margvíslegan hátt. Skemmtileg mynd náðist af forvitnum máf sem stillti sér upp fyrir framan linsuna. Myndin er ógreinileg en að öllum líkindum er um sílamáf að ræða. Hann er því fulltrúi fyrstu farfuglanna í Surtsey þetta vorið sem unnt er að staðfesta !

 

2. febrúar 2010

Steingrímur Hermannsson, fyrrverandi formaður Surtseyjarfélagsins er látinn. Steingrímur var formaður félagsins frá stofnun þess 1964 fram til ársins 2009 eða í 44 ár. Steingrímur lagði ætíð áherslu á að Surtsey væri í senn íslenskur og alþjóðlegur rannsóknastaður sem mikilvægt væri að veita aðgengi að en standa jafnframt vörð um. Þannig markaði hann félaginu farsæla stefnu sem áfram verður höfð að leiðarljósi.

Surtseyjarfélagið er Steingrími afar þakklátt fyrir samstarfið undanfarna áratugi, vel unnin störf og vottar fjölskyldu og aðstandendum hans samúð.

 

 

6. júlí, 2009

Aðalfundur Surtseyjarfélagsins var haldinn 2. júní síðastliðinn í Þjóðmenningarhúsinu. Á fundinum flutti Steingrímur Hermannsson, fráfarandi formaður, skýrslu stjórnar. Þar tæpti hann m.a. á því helsta sem borið hefur á góma við rannsóknir í eyjunni síðustu þrjú ár og breytt umhverfi Surtseyjarrannsókna í kjölfar þess að Surtsey var tekin inn á heimsminjaskrá UNESCO í júlí 2008.

Í lok ræðu sinnar greindi Steingrímur frá því að hann myndi ekki gefa kost á sér til endurkjörs sem formaður félagsins. Aðrir stjórnarmenn sem ekki gáfu kost á sér til endurkjörs voru þeir Sveinn P. Jakobsson varaformaður, Hörður Kristinsson og Kjartan Thors.

Þetta þykja mikil þáttaskil í starfsemi Surtseyjarfélagsins þar sem að Steingrímur hefur verið formaður allt frá stofnun þess 1965 eða í 44 ár. Félagið hefur undir dyggri formennsku Steingríms sinnt veigamiklu hlutverki við skipulag og samræmingu rannsókna í Surtsey sem hlaut mikla viðurkenningu við afgreiðslu heimsminjanefndar UNESCO á umsókn Surtseyjar á heimsminjaskrá.

Á aðalfundinum var Hallgrímur Jónasson forstöðumaður Rannsóknamiðstöðvar Íslands kjörinn nýr formaður félagsins en aðrir í stjórn eru þeir Borgþór Magnússon, Eyþór Einarsson, Hallgrímur Daði Indriðason, Karl Gunnarsson, Páll Einarsson Vignir Thoroddsen, Bjarni Diðrik Sigurðsson, Sigvaldi Árnason og Starri Heiðmarsson.

Nýkjörin stjórn félagsins þakkar fráfarandi stjórnarmönnum fyrir vel unnin störf í gegnum tíðina. Steingrími er þakkað sérstaklega fyrir mikilvægt framlag hans í þágu Surtseyjarfélagsins frá upphafi þess.

 

20. júní, 2009

Surtseyjarritin frá upphafi eru aðgengileg á tölvutæku sniði. Nýjasta ritið, Surtsey Research 12, kom út í maí 2009 en þar er að finna margar áhugaverðar greinar um rannsóknir í Surtsey. Meira hér.

26. maí, 2009

Þann 19.-21. maí var farinn leiðangur til Surtseyjar en megin tilgangur hans var að setja upp sjálfvirka veðurstöð og vefmyndavél. Leiðangurinn lukkaðist mjög vel í alla staði í góðu veðri. Það bar einnig til tíðinda að heiðlóuhreiður fannst í eyjunni í fyrsta skipti en hún er þar með fyrsti vaðfuglinn sem verpur í Surtsey. Þetta erþví merkilegur áfangi í þróun lífríkis á eyjunni. Leiðangursmenn rákust jafnframt á hunangsflugu (býflugu) á eyjunni í fyrsta skipti.

Sjálfvirkar veðurathuganir í Surtsey

Vefmyndavél í Surtsey

Fjallað er nánar um leiðangurinn á vefsíðu Náttúrufræðistofnunar.

 

Surtsey á heimsminjaskrá UNESCO

Í júlí 2008 var Surtsey og friðlandið umhverfis skráð á heimsminjaskrá Sameinuðu þjóðanna (UNESCO) sem einstakur staður náttúruminja á heimsmælikvarða. Eyjan hefur verið verndað friðland frá því að hún myndaðist í eldgosi og því einstök rannsóknarstöð en það skipaði sérstöðu eyjunnar að því að fram kemur í rökstuðningi heimsminjanefndar UNESCO.

Nánari umfjöllun um tilnefninguna er í vefútgáfu "The UNESCO Courier" (á ensku).

Skýrslu Náttúrufræðistofnunar um tilnefningu Surtseyjar má nálgast hér